S‘ richtich‘ Gschmäckle

Von Christian Breitling, geb. 1873 in Dachtel

Aus dem Gedichtbändchen „Ällerhand“, hrsg. 1934

Dr Jakobfrieder hat s zwoit Weib.

Se ist net o=gschickt – o beileib! –

en ällem durch von A bis Zet;

doch wia sei’ Erste kocht se net.

Ond d’Bohna, wo er doch so ma’,

dia brengt se nia so richtich na’.

Er sait au drom ganz o=verhehlt,

daß do halt s richtich Gschmäckle fehlt,

so a’ Aroma, zart ond fei’;

mer schmecks schao zu dr Haustür rei’

ond d’Stiaga ruf bei jedem Tritt,

dees gäb den guata Appetit.

Dees Weib, des bsennt sich rom ond nom

ob se net uf des Gschmäckle komm.

Se hot doch en dr „Post“ studiart,

hot älles kocht ond au serviert

ond ällweil s Lob ghet überall.

Jetzt stoht se do! – Dees ist fatal!

Grad hot se wieder Bohna dra’

no’ rückt a’ Hauf Soldata a’

– se send vom Ersta Regiment –

do muaß se doch au gucka gschwend.

Schnell saust se na ond lauft em Tritt

noh durch da halba Flecka mit.

Uf ei’mol fällts=r=siadich ei:

was wurds au mit mei’m Kocha sei?

Se schlächt da Schurz nuf, rennt ond rennt,

doch – d’Bohna send schau ganz verbrennt. Do kommt a’dicker Gstank – o Graus!

zom Greifa dick zur Haustür raus.

Wia do des Weible gschwend verschrickt!

Se hot sich aber bald drei’ gschickt

Ond für sich ane sait se noh:

Mei Alter brommt jo so wie so,

do guck i nemme z’liab kromm nom;

heut weiß i wenigstens, worom.”

Dr Frieder aber, meiner Seel!

Der schnüffelt ond wurd ganz fidel.

O Weible“ – sait er d`Stiag ruff schao –

diar hao=n=i bitter O=recht dao!

Du bist a’ Weib, wo kocha ka’:

He u t i st d e s G s ch m ä ck l e w i e d e r d r a’!